0:00
/
1ܘܟܲܕ ܩܘܼܪܒܸܢܗܘܿܢ ܠܐܘܿܪܸܫܠܸܡ: ܠܒܹܝܬ ܦܵܓܹܐ ܘܠܒܹܝܬ ܥܲܢܝܵܐ: ܠܟܸܣ ܛܘܼܪܵܐ ܕܙܲܝܬܹ̈ܐ: ܫܘܼܕܸܪܹܗ ܬܪܹܝ ܡ̣ܢ ܬܲܠܡܝܼܕܘܼ̈ܗܝ. 2ܘܐَܡܝܼܪܹܗ ܐܸܠܵܝܗܝ: ܙܹܠَܡܘܿܢ ܠܗ̇ܝ ܡܵܬܵܐ ܕܝ݇ܠܵܗ̇ ܠܒܲܪܩܘܼܒ̣ܠܵܘܟ̣ܘܿܢ: ܘܕܲܪܣܵܥܲܬ ܕܥܵܒܼܪܝܼܬܘܿܢ ܓܵܘܵܗ̇: ܒܸܬ ܡܲܫَܟ̰ܚܝܼܬܘܿܢ ܓ̰ܲܥܫܵܐ ܐَܣܝܼܪܵܐ: ܕܐ݇ܢܵܫܵܐ ܡ̣ܢ ܒܢܲܝ̈ܢܵܫܵܐ ܗܵܠܵܐ ܠܵܐ ܝܬܸܒ̣ܠܹܗ ܥܲܠܘܼܗܝ. ܫܪܹܝܡܘܿܢ ܡܲܝܬَܡܘܿܢ ܠܹܗ. 3ܘܐܸܢ ܐ݇ܢܵܫܵܐ ܐܵܡܸܪ ܐܸܠܵܘܟ̣ܘܿܢ: ܩܵܡܘܿܕܝܼ ܒܸܥܒ̣ܵܕܵܐ ܝܬܘܿܢ ܐܵܗܵܐ ܐَܡܘܿܪܘܼܢ ܐܸܠܹܗ: ܕܠܡܵܪܲܢ ܠܵܙܸܡ ܝܼܠܹܗ: ܘܕܲܪܣܵܥܲܬ ܒܸܬ ܫܵܕܸܪܹܗ ܠܲܐܟ̣ܵܐ. 4ܘܐَܙܸܠܗܘܿܢ ܡܘܼܫَܟ̰ܸܚܠܗܘܿܢ ܓ̰ܲܥܫܵܐ ܐَܣܝܼܪܵܐ ܥܲܠ ܬܲܪܥܵܐ ܠܒܲܕܲܪ ܒܥܵܠܘܿܠܵܐ: ܘܫܪܹܠܗܘܿܢ ܐܸܠܹܗ. 5ܘܐ݇ܢܵܫܹ̈ܐ ܡ̣ܢ ܕܐܵܢܝܼ ܕܟܸܠܝܹܐ ܗ݇ܘܵܘ ܬܵܡܵܐ ܐَܡܸܪܗܘܿܢ ܐܸܠܵܝܗܝ: ܡܘܼܕܝܼ ܒܸܥܒ̣ܵܕܵܐ ܝܬܘܿܢ ܒܸܫܪܵܝܵܐ ܠܓ̰ܲܥܫܵܐ. 6ܘܐܵܢܝܼ ܐَܡܸܪܗܘܿܢ ܐܸܠܵܝܗܝ ܐܲܝܟܼ ܕܦܩܝܼܕܵܝܠܹܗ ܝܼܫܘܿܥ: ܘܫܒ̣ܝܼܩܵܝܠܗܘܿܢ. 7ܘܡܘܼܬَܝܹܠܗܘܿܢ ܠܓ̰ܲܥܫܵܐ ܠܟܸܣ ܝܼܫܘܿܥ: ܘܕܪܹܠܗܘܿܢ ܥܲܠܘܼܗܝ ܓ̰ܘܼܠܵܝ̈ܗܝ: ܘܪܟܸܒ̣ܠܹܗ ܥܲܠܘܼܗܝ. 8ܐܝܼܢܵܐ ܪܵܒܵܐ ܫܵܘܝܼ ܗ݇ܘܵܘ ܠܓ̰ܘܼܠܵܝ̈ܗܝ ܒܐܘܼܪܚܵܐ: ܘܐ݇ܚܹܪ̈݇ܢܹܐ ܠܦܲܥܘܵܢܹ̈ܐ ܕܦܪܸܡܠܗܘܿܢ ܡ̣ܢ ܚܲܩܠܵܢܹ̈ܐ. 9ܘܐܵܙܵܠَܢܹ̈ܐ ܩܵܕَܡܘܼܗܝ: ܘܐܵܬܝܵܢܹ̈ܐ ܒܵܬَܪܹܗ: ܩܘܼܘܸܚܠܗܘܿܢ: ܒܹܐܡܵܪܵܐ: ܐܘܿܫܲܥܢܵܐ: ܒܪܝܼܟ̣ܵܐ ܝܠܹܗ ܗ̇ܘ ܕܒܹܐܬܵܝܵܐ ܝܠܹܗ ܒܫܸܡܹܗ ܕܡܵܪܝܵܐ. 10ܘܒܪܝܼܟ̣ܬܵܐ ܝ݇ܠܵܗ̇ ܡܲܠܟܘܼܬܵܐ ܕܒܹܐܬܵܝܵܐ ܝ݇ܠܵܗ̇: ܕܒܵܒܲܢ ܕܵܘܝܼܕ: ܐܘܿܫܲܥܢܵܐ ܒܲܡܪ̈ܵܘܡܹܐ. 11ܘܥܒܸܪܹܗ ܠܐܘܿܪܸܫܠܸܡ ܠܗܲܝܟܠܵܐ: ܘܚܸܪܹܗ ܚܵܕܸܪ̈ܘܵܢܹܗ ܠܟܠ ܡܸܢܕܝܼ: ܘܟܲܕ ܐܵܕܝܼܵܐ ܪܲܡܫܵܐ ܗ݇ܘܵܐ: ܦܠܸܛܠܹܗ ܠܒܹܝܬ ܥܲܢܝܵܐ ܥܲܡ ܬܪܸܥܣܲܪ. 12ܘܒܝܵܘܡܵܐ ܐ݇ܚܹܪ݇ܢܵܐ: ܟܲܕ ܦܠܸܛܠܗܘܿܢ ܡ̣ܢ ܒܹܝܬ ܥܲܢܝܵܐ: ܟܦܸܢܹܗ. 13ܘܚܙܹܐܠܹܗ ܚܲܕَ ܐܝܼܠܵܢܵܐ ܕܬܹܐܢܵܐ ܡ̣ܢ ܪܸܚܩܵܐ: ܕܐܝܼܬ ܗ݇ܘܵܘ ܒܝܹܗ ܛܲܪ̈ܦܹܐ: ܘܐَܬܹܐܠܹܗ ܕܐܸܢ ܒܲܠܟܵܐ ܡܵܫَܟ̰ܸܚ ܗ݇ܘܵܐ ܒܝܹܗ ܡܸܢܕܝܼ ܘܟܲܕ ܐَܬܹܐܠܹܗ ܠܟܸܣܠܹܗ: ܠܵܐ ܡܘܼܫَܟ̰ܸܚܠܹܗ ܡܸܢܕܝܼ ܫܒ̣ܘܿܩ ܡ̣ܢ ܛܲܪ̈ܦܹܐ: ܣܵܒܵܒ ܕܠܹܐ ܗ݇ܘܵܐ ܙܲܒ̣ܢܵܐ ܕܬܹܐܢܹ̈ܐ. 14ܘܓ̰ܘܼܘܸܒܠܹܗ ܘܐَܡܝܼܪܹܗ ܐܸܠܹܗ: ܡܐܵܕܝܼܵܐ ܘܠܥܵܠܲܡ ܐ݇ܢܵܫܵܐ ܡܸܢܘܼܟ ܛܥܘܿܢܬܵܐ ܠܵܐ ܐܵܟܼܸܠ. ܘܫܡܸܥܠܗَܘܿܢ ܬܲܠܡܝܼܕܘܼ̈ܗܝ. 15ܘܐ݇ܬܹܐܠܗܘܿܢ ܠܐܘܿܪܸܫܠܸܡ: ܘܥܒܸܪܹܗ ܠܗܲܝܟܠܵܐ: ܘܫܘܼܪܹܐܠܹܗ ܠܦܵܠܘܿܛܹܐ ܠܐܵܢܝܼ ܕܒܸܙܒ̣ܵܢܵܐ ܗ݇ܘܵܘ ܘܙܵܒܘܿܢܹܐ ܓܵܘ ܗܲܝܟܠܵܐ: ܘܡܘܼܚܕܸܪܹܗ ܠܨܘܼܦܪܹ̈ܐ ܕܨܲܪ̈ܵܦܹܐ: ܘܠܟܘܼܪ̈ܣܵܘܵܬܹܐ ܕܐܵܢܝܼ ܕܙܵܒ̇ܘܿܢܹܐ ܝܵܘܢܹ̈ܐ. 16ܘܠܵܐ ܫܒܸܩܠܹܗ ܕܐ݇ܢܵܫܵܐ ܡܲܥܒܸܪ ܗ݇ܘܵܐ ܡܵܐܢܵܐ ܡ̣ܢ ܓܵܘ ܗܲܝܟܠܵܐ. 17ܘܡܵܠܸܦ ܗ݇ܘܵܐ ܘܐܵܡܸܪ ܐܸܠܵܝܗܝ: ܠܹܐ ܝܠܹܗ ܟܬܝܼܒ̣ܵܐ ܕܒܲܝܬܝܼ ܒܲܝܬܵܐ ܕܨܠܘܿܬܵܐ ܒܸܬ ܦܵܐܹܫ ܩܸܪܝܵܐ ܠܟܠܵܝܗܝ ܛܵܝܸܦܹ̈ܐ: ܐܝܼܢܵܐ ܐܲܚܬܘܿܢ ܥܒܸܕܠܵܘܟ̣ܘܿܢ ܐܸܠܹܗ ܓܸܦܝܼܬܵܐ ܕܓ̰ܵܠܵܠܝܹܐ. 18ܘܫܡܸܥܠܗَܘܿܢ ܓܘܼܪ̈ܵܢܹ̈ܐ ܕܟܵܗܢܹ̈ܐ ܘܣܵܦܪܹ̈ܐ: ܘܛܸܥܠܗܘܿܢ ܕܵܐܟ̣ܝܼ ܕܬܵܠܩܝܼ ܗ݇ܘܵܘ ܠܹܗ: ܣܵܒܵܒ ܕܙܕܸܥܠܗܘܿܢ ܡܸܢܹܗ: ܣܵܒܵܒ ܕܟܠܹܗ ܟܸܢܫܵܐ ܥܵܓ̰ܒܝܼ ܗ݇ܘܵܘ ܒܝܘܼܠܦܵܢܹܗ. 19ܘܟܲܕ ܗَܘܹܐܠܹܗ ܪܲܡܫܵܐ: ܟܹܐ ܦܵܠܸܛ ܗ݇ܘܵܐ ܠܒܲܕܲܪ ܡ̣ܢ ܡܕܝܼܢَܬܵܐ. 20ܘܒܩܵܝܕܲܡܬܵܐ: ܟܲܕ ܒܸܥܒ̣ܵܪܵܐ ܗ݇ܘܵܘ: ܚܙܹܐܠܗܘܿܢ ܗ̇ܘ ܐܝܼܠܵܢܵܐ ܕܬܹܐܢܵܐ ܒܪܝܼܙܵܐ ܡ̣ܢ ܥܸܩܪܹܗ. 21ܘܕܟܸܪܹܗ ܟܹܐܦܵܐ ܘܐَܡܝܼܪܹܗ ܐܸܠܹܗ: ܪܵܒܝܼ: ܗܵܐ: ܗ̇ܘ ܐܝܼܠܵܢܵܐ ܕܬܹܐܢܵܐ ܕܠܸܛܠܘܼܟܼ ܒܪܝܼܙܵܐ ܝܠܹܗ. 22ܘܓ̰ܘܼܘܸܒܠܹܗ ܝܼܫܘܿܥ ܘܐَܡܝܼܪܹܗ ܐܸܠܵܝܗܝ: ܗܵܘܝܵܐ ܠܵܘܟ̣ܘܿܢ ܗܲܝܡܵܢܘܼܬܵܐ ܒܐܲܠܵܗܵܐ. 23ܬܪܘܿܨܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܡ̇ܢ ܕܐܵܡܸܪ ܠܐܵܗܵܐ ܛܘܼܪܵܐ: ܦܘܼܫ ܫܩܝܼܠܵܐ: ܘܦܘܼܫ ܪܘܼܦܝܵܐ ܒܝܵܡܵܐ: ܘܠܵܐ ܦܵܐܹܫ ܒܫܸܟ ܒܠܸܒܹܗ: ܐܸܠܵܐ ܗܲܡܸܢ ܕܗܵܘܹܐ ܗ̇ܘ ܡܸܢܕܝܼ ܕܐܵܡܸܪ: ܒܸܬ ܗܵܘܹܐ ܠܹܗ ܡܸܢܕܝܼ ܕܐܵܡܸܪ. 24ܣܵܒܵܒ ܕܐܵܗܵܐ ܒܹܐܡܵܪܵܐ ܝܘܸܢ ܐܸܠܵܘܟ̣ܘܿܢ: ܟܠ ܡܸܢܕܝܼ ܕܨܵܠܝܼܬܘܿܢ ܘܛܵܠܒܝܼܬܘܿܢ: ܗܲܡܸܢܘܿܢ 25ܕܩܘܼܒܸ̇ܠܵܘܟ̣ܘܿܢ: ܘܒܸܬ ܗܵܘܹܐ ܠܵܘܟ̣ܘܿܢ. ܘܐܝܼܡܲܢ ܕܟܵܠܝܼܬܘܿܢ ܠܨܵܠܘܿܝܹܐ: ܦܲܚܠܗܘܿܢ ܐܸܢ ܡܸܢܕܝܼ ܐܝܼܬ ܠܵܘܟ̣ܘܿܢ ܥܲܠ ܐ݇ܢܵܫܵܐ: ܕܐܘܼܦ ܒܵܒܵܘܟ̣ܘܿܢ ܕܒܫܡܲܝܵܐ ܦܵܚܸܠ ܐܸܠܵܘܟܼܘܿܢ ܓܢܵܗܵܘ̈ܟ̣ܘܿܢ. 26 ܐܝܼܢܵܐ ܐܸܢ ܐܲܚܬܘܿܢ ܠܵܐ ܦܵܚܠܝܼܬܘܿܢ؛ ܐܘܼܦ ܒܵܒܵܘܟ̣ܘܿܢ ܕܒܫܡܲܝܵܐ ܠܹܐ ܦܵܚܸܠ ܠܵܘܟ̣ܘܿܢ ܓܢܵܗܵܘ̈ܟ̣ܘܿܢ. 27ܘܐ݇ܬܹܐܠܗܘܿܢ ܡܸܢَܕܪܸܫَ ܠܐܘܿܪܸܫܠܸܡ: ܘܟܲܕ ܒܸܚܕܵܪܵܐ ܗ݇ܘܵܐ ܓܵܘ ܗܲܝܟܠܵܐ: ܐ݇ܬܹܐܠܗܘܿܢ ܠܟܸܣܠܹܗ ܓܘܼܪ̈ܵܢܹܐ ܕܟܵܗܢܹ̈ܐ ܘܣܵܦܪܹ̈ܐ ܘܚܘܵܪ̈ܕܸܩܢܹܐ. 28ܘܐܵܡܪܝܼ ܐܸܠܹܗ: ܒܡܘܼܕܝܼ ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܬ: ܘܡܵܢܝܼ ܩܲܡ ܝܵܗَܒܸܠ ܠܘܼܟܼ ܐܵܗܵܐ ܗܘܼܟܡܵܐ ܕܥܵܒ̣ܕܸܬ ܐܲܢܹܐ. 29ܐܝܼܢܵܐ ܝܼܫܘܿܥ ܐَܡܝܼܪܹܗ ܐܸܠܵܝܗܝ: ܐܘܼܦ ܐܵܢܵܐ ܒܸܬ ܒܵܩܪܸܢ ܡܸܢܵܘܟ̣ܘܿܢ ܚܕܵܐ ܗܹܡܸܙܡܵܢ: ܘܓ̰ܲܘܸܒܝܼܬܘܿܢ ܠܝܼ: ܘܐܵܢܵܐ ܒܸܬ ܐܵܡܪܸܢܵܘܟ̣ܘܿܢ ܒܡܘܼܕܝܼ ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܢ. 30ܡܲܥܡܘܿܕܝܼܬܹܗ ܕܝܘܿܚܲܢܵܢ ܡ̣ܢ ܫܡܲܝܵܐ ܗ݇ܘܵܐ: ܝܲܢ ܡ̣ܢ ܒܢܲܝ̈ܢܵܫܵܐ: ܓ̰ܲܘܸܒܘܿܢ ܠܝܼ. 31ܘܚܫܸܒ̣ܠܗܘܿܢ ܒܓܵܢܵܝܗܝ: ܒܹܐܡܵܪܵܐ: ܐܸܢ ܐܵܡܪܵܚ ܠܹܗ: ܡ̣ܢ ܫܡܲܝܵܐ: ܒܸܬ ܐܵܡܸܪ ܐܸܠܲܢ: ܒܲܣ ܩܵܡܘܿܕܝܼ ܠܵܐ ܗܘܼܡܸܢܵܘܟ̣ܘܿܢ ܐܸܠܹܗ. ܐܸܠܵܐ ܐܸܢ ܐܵܡܪܵܚ: ܡ̣ܢ ܒܢܲܝ̈ܢܵܫܵܐ: ܙܕܸܥܠܗܘܿܢ ܡ̣ܢ ܛܵܝܸܦܵܐ. 32ܣܵܒܵܒ ܟܠܵܝܗܝ ܕܒ̣ܝܼܩܹܐ ܗ݇ܘܵܘ ܠܝܘܿܚܲܢܵܢ ܕܒܫܲܪܝܼܪܘܼܬܵܐ ܢܒ̣ܝܼܵܐ ܗ݇ܘܵܐ. 33ܘܓ̰ܘܼܘܸܒܠܗܘܿܢ ܘܐܵܡܪܝܼ ܠܝܼܫܘܿܥ: ܠܹܐ ܝܲܕܥܵܚ. ܘܝܼܫܘܿܥ ܐَܡܝܼܪܹܗ ܐܸܠܵܝܗܝ: ܘܐܘܼܦ ܐܵܢܵܐ ܠܹܐ ܐܵܡܪܸܢܵܘܟ̣ܘܿܢ ܒܡܘܼܕܝܼ ܗܘܼܟܡܵܐ ܐܲܢܹܐ ܒܸܥܒ̣ܵܕܵܐ ܝܘܸܢ.